Vilaxoán celebra o sábado e domingo seguintes ó 16 de xullo as festas do Carme. A procesión marítima é o máis destacado dos actos relixiosos. Na vertente máis lúdica, cabe cita-la celebración do festival “Vilaxoán canta”, un certame no que os veciños fan gala das súas dotes para o canto, formando unha multitudinaria coral. Para que a festa sexa completa, non faltan as verbenas e actuacións de grupos de gaitas e baile galego.

A segunda festa de Vilaxoán celébrase rematado o verán. Trátase das celebracións en honor á Virxe do Rosario, que dá nome á confraría da vila. Os festexos teñen lugar o primeiro domingo de outubro e pechan o ciclo festivo do verán en Vilagarcía. Verbenas, actuacións da banda e exhibicións folclóricas compoñen o programa festivo.