A Fundación do mesmo nome, na que se integran 18 concellos das dúas marxes da ría de Arousa e municipios da beira do Ulla, organiza cada ano unha peregrinación que rememora a translación do corpo do Apóstolo Santiago dende Jaffa (Palestina) ata Iria Flavia, localidade dende a que, segundo a tradición, foi conducido a Compostela. O remonte realízase tódolos anos durante o mes de agosto, e a saída realízase dende un dos municipios costeiros da ría de Arousa. Concellos e outras institucións poñen a disposición das persoas interesadas en participar varias embarcacións, nas que o público en xeral e as autoridades recorren o primeiro camiño de Santiago, xa que non se trata de unha vía aberta polos peregrinos, senón da orixinaria. Esta actividade vense realizando dende o ano 1965.

A Fundación Ruta Xacobea do Mar de Arousa e Ulla, declarada de interese cultural por parte da Xunta de Galicia, organiza paralelamente diversas actividades, como charlas, conferencias, concursos literarios e de investigación. Os fins da fundación son promove-los valores do mar de Arousa e Ulla, no terreo artístico, cultural, gastronómico, turístico, etc.