Xullo é o mes festivo por excelencia na vila mariñeira do Carril. O Carme (16 de xullo), O Apóstolo (25 de xullo) e San Fidel (domingo seguinte ó Apóstolo) son as tres citas principais, ás hai que engadi-la celebración de San Roque (16 de agosto). A festividade da Virxe do Carme, patrona dos mariñeiros, vívese no Carril con gran intensidade. O acto litúrxico máis destacado é a procesión marítima que ten lugar pola tarde. A imaxe da Virxe, protectora dos homes do mar, é levada sobre as augas a bordo dun barco e seguida por unha flotiña de embarcacións mentres dende a beira, centos de persoas contemplan o recorrido. Ademais, celébranse verbenas e actuacións de grupos folclóricos.

O Apóstolo é outra das festividades que se vive máis intensamente no Carril. Ese día celébrase o tradicional baile das espadas, no que participan varios xoves do pobo. Non faltan na festa as tradicionais figuras de xigantes e cabezudos, a actuación da banda de música e os pasarrúas a cargo de grupos folclóricos.

San Fidel pecha o calendario festivo de xullo. Para honrar ó santo italiano, ademais dos actos relixiosos prográmanse verbenas e exhibicións folclóricas.