Organizada pola agrupación micolóxica A Cantarela, é unha excelente oportunidade de coñece-las setas, un producto aínda pouco utilizado en Galicia malia a riqueza micolóxica dos nosos montes. As actividades teñen lugar na segunda quincena de novembro e desenvólvense en dous escenarios: a Praza da Pescadería e a Casa da Cultura. No programa inclúese unha exposición con setas dos montes da comarca, que se recollen nunha saída ó campo organizada pola propia asociación. Tamén se inclúe numeroso material gráfico que axuda a distingui-los exemplares comestibles e velenosos; paralelamente, celébranse unha serie de charlas e un concurso de fotografía micolóxica. A Semana termina na Praza da Pescadería cunha degustación de pratos, tanto salgados como doces, que teñen como principais ingredientes as setas. Tamén se premian as mellores preparacións que inclúen este alimento na súa composición.