VILAGARCIA DE AROUSA

CULTURA
ALBAROUSA CELEBRA ESTE ANO O SEU 25 ANIVERSARIO CON NOVOS STANDS E CONTIDOS
A praza da Peixería volverá acoller este ano, entre o 11 e o 21 de agosto, a mostra do albariño Alabarousa, que para celebrar a súa edición número 25 estreará novas casetas de degustación e contidos. O pregón da festa será lido por José Luis Vilela Conde, director da Voz de Galicia. Na mostra participarán unhas 30 bodegas, e entre 50 e 60 están anotadas para a cata.

Antonio Neira, máximo representante da organización, explicou na presentación do evento que coa axuda de institucións públicas e entidades privadas se inaugurarán unhas casetas totalmente novas, e se habilitarán cen asentos máis no recinto. Ademais, farase un posto para as entidades benéficas e ONGs do municipio, no que poderán dar a coñecer as súas actividades e recadar fondos mediante a elaboración e venda de postres, que complementarán a oferta da feira.

A carón da mostra celebrarase, como todos os anos, unha Semana Gastronómica na que poderán degustarse unha ampla variedade de produtos da gastronomía galega. A novidade deste ano son os lombos de bacallao á pedra, o “lomo al ajillo” e a orella de porco, que se incorporan a unha oferta que inclúe as chuletas á pedra, as filloas, chourizos, lombo, embutidos ibéricos, queixo, etc.

A oferta vinícola e gastronómica complétase coa celebración de queimadas e as actuacións de grupos folclóricos. A organización agarda repetir os excelentes resultados do pasado ano, en que se alcanzou a cifra de 100.000 visitas.

Pola súa banda o concelleiro de Cultura e Turismo, Roberto Araújo, salientou que a mostra é unha das propostas o con máis éxito dentro do programa de Verán Vilagarcía e que coa organización deste e outros actos, se conseguiu este ano un logro tan importante como a declaración das festas de Vilagarcía como de Interés Turístico Nacional. Araújo recalcou que Albarousa é un éxito para todos e que del tamén se benefician os establecementos hostaleiros do municipio.